Jacob Sagan muji, bala pengundi sitak Baram
MARUDI: Sapit Menteri Dagang Entarabansa enggau Industri Malaysia Dato Jacob Dungau Sagan muji sereta meri besai terima kasih ngagai bala pengundi di pelilih Baram, kelebih agi sitak Parlimen P.220 Baram tegal menang maya bepilih besai apin lama. Iya ukai semina menang, tang bulih mayuh majoriti.
Ku iya nampung jaku, bala raban bansa di Baram diatu udah mereti agi pasal penguntung kena pegai perintah Barisan Nasional (BN) ti siru ka rayat, semampai ngenataika pemansang.
“Nya alai nadai kebuah kitai enda sayauka perintah ngingatka pengelantang rayat,” ku Jacob ke meri madah diri berutang budi ngagai rayat ke udah ngundi iya ngujungka iya dipadu Perdana Menteri nyadi sapit menteri dalam kabinet menua Malaysia.
Iya meri besai terima kasih ngagai Perdana Menteri Datuk Seri Abdullah Ahmad Badawi ke udah ngarapka iya mega pengawa nyadi sapit menteri nya.
Raban bansa di Baram ku iya udah ngayanka penaluk sida ngagai perintah BN lalu nambah penyampau kerusi BN dalam parlimen, nya alai sida patut diberi tinggi puji sereta besai terima kasih.
Jaku nya dipansutka sapit menteri nya lebuh ke bejaku ba Pengerami Tuai Begulai enggau Rayat di rumah panjai TR Victor Wak Pasu di Kuala Tutoh malam kemari.
Sama bisi enggau ngulu pengari rayat Kunsil Nengeri Telang Usan Lihan Jok, ke terang ngayanka kerejasama entara ketuai politik BN dalam pelilih tu.
Jacob madah pengawa iya nyadi sapit menteri nya manah endar ka rayat, laban iya ulih nyadi penyambung entara perintah enggau rayat. Taja pan iya sigi balat kiruh ngereja pengawa nyadi sapit menteri, iya agi tetap enggau naka ulih datai ngabas sitak bepilih diri empu sereta tetap ngenataika projek pemansang ngagai genap sitak menua, nyengkaum menua Baram empu, ku iya.
Rega minyak ke niki laban rega minyak di serata dunya tu niki magang endang amat ngeribat pengidup bala mensia mayuh di menua pesisir. Taja pia ku iya, perintah deka meri ribet ngagai bala orang pesisir ke bisi injin sangkut, injin padi, injin api enggau injin bukai.
“Kita anang enda nanya ngagai opis DO pasal ribet tu,” ku iya ngajar sida.
Maya nya, Jacob mega bisi ngagihka gran perintah ngagai SIB Mulu Sentral penyampau RM5,000; Regatta Mulu (RM5,000), Long Ukok Rumah Christopher Pusu (RM15,000), Kampung Benawa (RM22,000) kena meli tangki ai Kuala Tutoh (RM10,000) kena meresi sungai; Biro Indu (RM5,000); PIBG SK Kuala Tutoh (RM5,000) enggau Gerija Katolik Kuala Tutoh (RM5,000).
Sama bisi bejaku SAO Keli Mareng ke ngarika tuan DO, Pengulu Herbert Lawai; David Belulok (Jasa), Dennis Ugak (LSSS); Esmond Emang (JPN); Sjn Mejar Duncan Aup (PDRM) enggau sekeda bala Tuai Kampung.
Lebuh ke baru datai enggau bala raban iya, Dato Jacob diberi basa bejadika projek Linkway Kuala Tutoh ke nyambung dua buah rumah kampung, iya Kampung Mulong enggau rumah panjai asal sida.
JUST INFO FOR US TO READ.
REGARDS.
TILL THAN.
No comments:
Post a Comment